ڈی یو کے 28 کالجوں کے ٹیچرز کو وقت پرنہیں مل رہی تنخواہ

نئی دہلی، 30 اکتوبر (یواین آئی) دہلی یونیورسٹی کے 28 کالجوں کو وقت پر مکمل فنڈ نہ ملنے کے سبب مالی بحران کھڑا ہو گیا ہے اور ٹیچرز کو وقت پر تنخواہ نہیں مل رہی ہے ۔یونیورسٹی سے منسلک نیشنل ڈیموکریٹک ٹیچرز فرنٹ کے رہنماوں نے دہلی کے نائب وزیر اعلی منیش سسودیا کو خط لکھ کرفنڈ فوراً جاری کرنے کا مطالبہ کیا ہے ۔ فرنٹ کے رہنما اے کے بھاگی، راجیش گوگنا اور وی ایس نیگی نے مسٹر سسودیا کو لکھے خط میں کہا ہے کہ دہلی یونیورسٹی کی طرف سے فنڈز فراہم کررہی کالجوں کو دہلی حکومت کی طرف سے فنڈ نہیں ملنے پر پہلے بھی احتجاج و مظاہرہ کیا جا چکا ہے اور اب پھر ہم آپ کی توجہ اس مسئلہ کی جانب مبذول کررہے ہیں کہ کچھ کالجوں میں اساتذہ اور غیر تدریسی ملازمین کو ستمبر کی تنخواہ 25 دن بعد ملی ہے اور بہت سے کالجوں میں تو طالب علموں کے فنڈ کی رقم سے اساتذہ کو تنخواہ دی گئی ہے ۔خط میں کہا گیا ہے کہ دہلی حکومت نے 12 کالجوں کو فنڈ کا ایک ہی حصہ جاری کیا ہے جبکہ باقی 16 کالجوں کو سوا کروڑ میں سے صرف دس لاکھ روپے جاری کئے گئے ہیں۔ ان کالجوں کو دہلی حکومت پانچ فیصد فنڈ دیتی ہے جبکہ 12 کالجوں کو سو فیصد ۔ خط میں کہا گیا ہے کہ گذشتہ پانچ برسوںمیں دہلی حکومت نے ان کالجوں کو پانچ فیصد فنڈ کبھی نہیں دیا ہے ۔ انہیں مشکل سے دو فیصد فنڈ ملا ہے ۔ اس وجہ سے کالجوں میں بنیادی سہولیات کا فقدان ہے ۔ ان لیڈروں نے فنڈ فوراًجاری کرنے کا مطالبہ کیا ہے اور دس سے زیادہ مزید مطالبات کی فہرست بھی پیش کردی ہے ۔